قصيدة لطالبات الكلية

من طرف **jafar sadiq** الخميس يونيو 10, 2010 5:51 pm

ماشايف مثل طولج بعد ما اشوف
واقنّع عيني بيش وتقنع وترضه

وانتي اخيالج ايغازلج من تمشين
وبعضه ايلوم بعضه وياكل ابعضه

كَبلج ما جنت شاعر غزل معروف
ولامو .. ما درو بيه الغرام امضه

وشعري البيه رفض وايرددونه الناس
من خزرة اعيونج يستمد رفضه

يلكلج براءه وكلشي يلصف بيج
واتشوفج اعيون الناس المغمضه

الشارع بيه صداع ايصير من تمشين
وطوله ايكوم يفتر يردم ابعرضه

و (ابو الطيب ) يغض النظر جان ايكول
بس لو شاف طولج فنّه اذا غضه

المستشفى اذا من بابها اتمرين
عراضه الشوفتج تتظاهر المرضه

خط احمر .. جمالج رسم فوك الكاع
وحضر تجوال خصرج وحّده ايفرضه

الفتنه الطائفيه اعيونج الحلوات
عليها احنه اختلفنه وبعد مانرضه

والأمن مايستقر وتفرضه شرطه وجيش
بس اسلاح عينج تكدر اتفرضه

والفوضه البلبلد مو من سياسيين
الفوضه البلبلد من شعرج الفوضه

كاغد ماي خدّج والهوه ايهز بيه
ومن كد رقته بلهوه مايرضه

حظه بيج النده .. بخدّج طبع نيشان
جا .. شتسوي بيج اشفافي من تحظه

عصر النهضه داخو بيه ماشافوه
وانتي الشايله ابصدرج الف نهضه

يلبعينج سحر ليل الله طش الشوكَ
وانجومه اعلى خدّج صاغهن فضه

الحظ من يشوفج صدفه بين الناس
يلزم حظه بيده ... ايطييح ابحظه

وغلط ( احمد مطر ) ميخلّد التاريخ
لأن عن لون خدّج ما كتب ومضه

قرضه من الشمع بالظلمه نطلب نور
وانتي النور منج يطلب القرضه

ولئن تعكس بياضج والبراءه البيه
وحّده ..( المرايه ) اتكوم تتشظه

بلزي من اشوفج كلي اصيرن عين
وافض كلشي امنديّه وخلكي ما فضه

مثل الظل وراج اعيوني مصلوبات
ودرب الجامعه خليت بيه رضه

وزير البحث اي لازم يحط اشروط
النظام الجامعه وعا المجلس ايعرضه

وايصدر قرار وكلها تعمل بيه
وتنصاع العماده وتعمل ابوعظه

طولج من يمر يم الاستعلامات
عميد الجامعه يوكف صنم لحظه

وباب الجامعه من يمه من تمشين
مدير القسم لازم يركض ايكظه

مو لجل العلم بلجامعه الطلاب
على مودج ترى الطلاب مكتظه

كراج الجامعه سنطه ويبجي العين
بس لمن تجينه اتصير بيه ركضه

المحاضر بلدرس ما يفتح الموضوع
لئن ملتهي ابثغرج رايد ايحفظه

وبلروضه خبر طش راح تتعينين
وعلى مودج زلم سجلت بلروضه

ارجو الرد
شكرا
ارجو ان تنال اعجابكم